Two Faced Friends (fadfada)

مرحبا

بما انه هاد اول بوست الي هون بدي اكتبه بالعربي مع اني بطيء بالطباعة العربي

يعني بصراحة الواحد ما بعرف شو بدو يحكي بس الواحد بطّل يعرف بمين يوثق ولاّ بمين.. بكون بحكي إشي مع حدا معين برجع بسمع اللي حكيته لهاد الشخص من شخص ثالث و بعرف انه الصديق (أو اللي بعتبره صديق) اللي كنت بحكي معه رايح ناقل اللي انا حاكيه للناس هيك لسبب مو قادر افهمه او اعرفه و عاملّي اياه موضوع نقاش مع ناس تانيين و نازل ينتقد فيّي..طيب ليش؟؟ بدك تحسّن صورتك و تلمّع منظرك على حساب ناس تانيين؟؟ ليش تخلق فكرة سلبية براس ناس بحبّوا و بحترموا هالشخص اللّي نازلة تنتقدي فيه؟؟ ما تعلّمتي من تخابيصك زمان؟؟

يعني انا عمري ما نمّيت على حدا و ما بطيق هالسوالف و اغلب مواضيعي بتكون بمواضيع عامة..من يومين بحكي مع هالفرند و بمزح معها بموضوع ما بمسها ولا بأثر عليها ولا على أي انسان ثاني و حضرتها بتروح ثاني يوم تنقل لجماعة من الاصدقاء المشتركة انه فلان حكى هيك و نازلة تنتقد فيّي..يختي ليش؟؟ ما انا اصلا بمزح معك و انتي عارفة هاد الاشي..بس فلسفة يعني؟؟ انتي عارفة انه الاصدقاء اللي انتي رحتي تفلسفتي قدامهم إجو حكولي بعاتبوني؟؟ والعتاب كان اإنّي كيف أوثق فيكي و احكي اللي حكيته سواء مزح أو لأ لأنك انسانة ما بنحكالك إشي و أنا حمار (مع إحترامي للحمير) اللي ما بتعلم مع إنّي شهدت اكثر من قصة و موقف معك عملتي فيهم مشاكل بين أصحاب و ناس كانوا بحترموا بعض قبل ما حضرتك تتفلسفي

انا مو قادر أفهم ليش هيك الناس؟؟ يعني انا ما حكيت إشي على انسان ولا حكيت حكي ممكن يمس انسان ولا ممكن اعملها بحياتي لأني انسان ما باجي بحدا ولا بحب حدا يجي فيّي بس ما بسكت عن حقّي كمان..يعني بس بدي افهم ليش هيك الناس بعملوا..يعني لو اصدقائي اللي إجو يحكولي شو صار بدهم يصغرو عقلهم كان كان صار مشاكل..بس الحمدلله انهم إجو ينبهوني منك

الواحد لما بتعامل مع الناس بعفوية و اذا بوثق باللّي قدامه انه يحكي و يمزح شو ما بيخطر عباله (طول ما هو بحدود الادب) و بعدين

يعرف انه هالطرف الثاني راح نقل الحكي بشكل وسخ (نية سيئة) غير الشكل اللّي هو انطرح فيها (نية حسنة) شو بدو يعمل؟؟ الواحد يعني يبطّل يوثق بانسان بالمرة؟؟ طيب اذا انتي يا كبيرة و عاقلة و مثقفة مو قادرين نوثق فيكي, بمين بدنا نوثق؟؟ شو خلّيتي لغيرك؟؟ و انا بعتبرك اختي الكبيرة بقدر أكون عراحتي و انا بحكي معك بعفوية تروحي تعملي هيك؟؟

إيييه الواحد بتعلّم من كيسه..مع إنه الواحد المفروض كمان يتعلّم من كيس غيره

سوري انا طوّلت بس كنت بشعبر عن اشي جواتي لول